Related Posts
Category : Gujarat
આર.એસ.એસ. વડા મોહન ભાગવત ગુજરાત પ્રવાસે:વડતાલ મંદિરમાં સંતો સાથે બેઠક યોજી,
રાષ્ટ્રીય સ્વયંસેવક સંઘના સરસંઘચાલક મોહન ભાગવત હાલ ગુજરાતના બે દિવસીય પ્રવાસે છે. આ મુલાકાતના પ્રથમ દિવસે તેઓ ખેડા જિલ્લામાં આવેલા સ્વામિનારાયણ સંપ્રદાયના સર્વોચ્ચ તીર્થસ્થાન વડતાલ પહોંચ્યા હતા. વડતાલ મંદિર ખાતે તેમણે ભગવાનના દર્શન કર્યા અને મંદિરના આચાર્ય તેમજ વરિષ્ઠ સંતો સાથે બેઠક યોજી વિવિધ વિષયો પર ચર્ચા કરી હતી.
વડતાલ પહોંચ્યા બાદ મોહન ભાગવતે મુખ્ય મંદિરમાં લક્ષ્મીનારાયણ દેવના દર્શન કર્યા હતા. દર્શન કર્યા બાદ તેમણે મંદિર પરિસરમાં આવેલા અક્ષર ભુવન અને હરિ મંડપની પણ મુલાકાત લીધી હતી. તેમણે આ સ્થળોના ઐતિહાસિક અને આધ્યાત્મિક મહત્વ વિશે જાણકારી મેળવી હતી. મંદિરના વ્યવસ્થાપકોએ તેમને મંદિરના ઇતિહાસ અને સંપ્રદાયની પ્રવૃત્તિઓથી માહિતગાર કર્યા હતા.
મંદિરના ગોપાળાનંદ ભુવન ખાતે આર.એસ.એસ. વડાનું વડતાલ મંદિરના સંતો દ્વારા પરંપરાગત રીતે સ્વાગત કરવામાં આવ્યું હતું. આ પ્રસંગે વડતાલ પીઠના આચાર્ય રાકેશપ્રસાદ મહારાજ ઉપસ્થિત રહ્યા હતા. સ્વાગત વિધિ બાદ મોહન ભાગવતે આચાર્ય અને અન્ય વરિષ્ઠ સંતો સાથે સૌજન્ય મુલાકાત કરી હતી. આ બેઠકમાં સંપ્રદાય અને સમાજ સેવાના કાર્યો અંગે પ્રાથમિક ચર્ચા કરવામાં આવી હતી.
આ મુલાકાત દરમિયાન વડતાલ મંદિરના ચેરમેન સંત વલ્લભ સ્વામી, કોઠારી દેવ પ્રકાશ સ્વામી, નૌતમ સ્વામી સહિતના અન્ય સંતો અને આગેવાનો હાજર રહ્યા હતા. મોહન ભાગવતે સંતો સાથે ગહન ચર્ચા કરી અને મંદિર દ્વારા ચલાવવામાં આવતી સામાજિક અને શૈક્ષણિક પ્રવૃત્તિઓની વિગતો મેળવી હતી. સંતોએ સંઘની રાષ્ટ્ર નિર્માણની પ્રક્રિયામાં સહયોગ અને આશીર્વાદ પાઠવ્યા હતા.
બે દિવસીય મુલાકાતના બીજા દિવસે મોહન ભાગવત અમદાવાદની મુલાકાતે જશે. તેઓ અમદાવાદ પાસે આવેલા જેતલપુર સ્વામિનારાયણ મંદિરના દ્વિશતાબ્દી વર્ષની ઉજવણીના આયોજનમાં સહભાગી થશે. જેતલપુર મંદિરના 200 વર્ષ પૂર્ણ થવાના પ્રસંગે યોજાનારા વિવિધ ધાર્મિક અને સાંસ્કૃતિક કાર્યક્રમોમાં તેમની ઉપસ્થિતિ મહત્વની ગણવામાં આવી રહી છે.
Load more
